ଭୁବନେଶ୍ୱର : ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ ବୁଧବାର ସନ୍ଧ୍ୟାରେ ମୁଖ୍ୟମନ୍ତ୍ରୀଙ୍କ ସହ ସଂସଦୀୟ କ୍ଷେତ୍ରର ବହୁ ଗୁରୁତ୍ୱପୂର୍ଣ୍ଣ ପ୍ରକଳ୍ପ ନେଇ ଆଲୋଚନା କରିଛନ୍ତି । ପୂର୍ବରୁ ଦିଆଯାଇଥିବା ୧୮ଟି ପ୍ରସ୍ତାବ ମଧ୍ୟରୁ ୧୧ଟି ପ୍ରକଳ୍ପର କାର୍ଯ୍ୟ ଚାଲିଥିବାରୁ ସେଥିପାଇଁ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଦେଇଛନ୍ତି । ଏହାସହ ଅନ୍ୟ ୭ଟି ପ୍ରକଳ୍ପର ସ୍ଥିତି ଓ ଅଗ୍ରଗତି ନେଇ ମଧ୍ୟ ମୁଖ୍ୟମନ୍ତ୍ରୀଙ୍କ ସହ ବିସ୍ତୃତ ଆଲୋଚନା କରିଥିଲେ ସାଂସଦ ଅପରାଜିତା ଷଡ଼ଙ୍ଗୀ।
ପ୍ରସ୍ତାବିତ ପ୍ରକଳ୍ପଗୁଡ଼ିକ ମଧ୍ୟରେ ଖଣ୍ଡଗିରି ନିକଟସ୍ଥ OHHDPC କ୍ୟାମ୍ପସକୁ ଅସ୍ଥାୟୀ ଭାବେ NGMAର ପୂର୍ବାଞ୍ଚଳ କେନ୍ଦ୍ର ପାଇଁ ଉପଯୁକ୍ତ ସ୍ଥାନ ବୋଲି ଜଣାଇ ଉକ୍ତ କ୍ୟାମ୍ପସକୁ NGMAକୁ ଅସ୍ଥାୟୀ ଭାବେ ପ୍ରଦାନ କରିବା, ପଳାଶୁଣୀ-ପାଣ୍ଡରାରେ ଆଧୁନିକ ହୋଲସେଲ୍ ମାଛ ମାର୍କେଟ୍, ଜଟଣୀ ବିଞ୍ଝାଗିରିରେ Central Research Institute of Yoga and Naturopathy (CRIYN) ପ୍ରତିଷ୍ଠା, ମା’ ଉଗ୍ରତାରା ମନ୍ଦିରର ବିକାଶ, ରାଜୁଆ Diversion Weir Projectର କାର୍ଯ୍ୟ, ଦୟା ନଦୀର ପାଣ୍ଡିଆବିଲି ବିଭାଜନ ସ୍ଥାନରେ ଅସ୍ଥାୟୀ Cross-bund ନିର୍ମାଣ, ସହିଦନଗର ହାଟ ପାଇଁ ୨ ଏକର ସରକାରୀ ଜମି ଆବଣ୍ଟନର ପ୍ରସ୍ତାବ, ଭୁବନେଶ୍ୱରରେ ଟ୍ରାଫିକ୍ ନିୟନ୍ତ୍ରଣ ପାଇଁ ୩୭ଟି ରାସ୍ତା କାମର ଯୋଜନା, ୫ ଏକର ଜମିରେ ୧୬୫କୋଟି ଟଙ୍କା ବ୍ୟୟ ଅଟକଳରେ ଖୋର୍ଦ୍ଧା ନୂତନ ବସ୍ ଷ୍ଟାଣ୍ଡ ନିର୍ମାଣ ପାଇଁ ଟେଣ୍ଡର ପ୍ରମୁଖ ରହିଛି ।
ଏଥିସହିତ ଆସନ୍ତା ୨୦୨୭ସୁଦ୍ଧା ବୋଲଗଡ଼-ବେଗୁନିଆକୁ NAC ମାନ୍ୟତା ପ୍ରଦାନ, ଖୋର୍ଦ୍ଧା ପ୍ରାଣନାଥ ମହାବିଦ୍ୟାଳୟର ବିକାଶ, ଜଟଣୀ ମୁନିସିପାଲିଟିର ଉଠାଦୋକାନୀମାନଙ୍କ ପାଇଁ ୮ କୋଟି ଟଙ୍କା ବ୍ୟୟ ଅଟକଳରେ ନୂତନ ଭେଣ୍ଡିଂ ଜୋନ୍ ଆଦି ପାଇଁ ସରକାରଙ୍କ ସହଯୋଗ ନେଇ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି ସାଂସଦ ଅପରାଜିତା ଷଡ଼ଙ୍ଗୀ। ତେବେ ଅନ୍ୟ କିଛି ପ୍ରକଳ୍ପର କାର୍ଯ୍ୟ ତ୍ୱରାନ୍ୱିତ ହୋଇପାରିନଥିବା ବେଳେ, ତାହାର କାରଣ ଓ ନିରାକରଣ ନେଇ ମଧ୍ୟ ମୁଖ୍ୟମନ୍ତ୍ରୀଙ୍କ ସହ ବ୍ୟାପକ ଆଲୋଚନା କରିଛନ୍ତି ସାଂସଦ ଅପରାଜିତା ଷଡ଼ଙ୍ଗୀ।
ଏହି ପଦକ୍ଷେପଗୁଡ଼ିକ ଭୁବନେଶ୍ୱର ସଂସଦୀୟ କ୍ଷେତ୍ରର ବିକାଶକୁ ଆହୁରି ଗତିଶୀଳ କରିବା ସହିତ ଜନସାଧାରଣଙ୍କୁ ଉନ୍ନତ ସୁବିଧା ଓ ସେବା ପ୍ରଦାନରେ ସହାୟକ ହେବ ବୋଲି କହିଛନ୍ତି ସାଂସଦ ଅପରାଜିତା ଷଡ଼ଙ୍ଗୀ।